Hafa þeir ekkert þarfara að gera...?

...en að storma í ,,við erum góður gæjarnir" fyrirfram dauðadæmda auglýsingaherferð?

 Jú, þeir ættu að vera heima hjá sér, vinna að því að koma á friði, leggja niður vopn og hætta að drepa saklausa borgara. Og hana nú! Snáfiði.

Heimsókn Ísraela til Íslands afþökkuð

Til sölu!

Ágætis tilboð í kreppunni:

 Hér er notaður legsteinn til sölu.  Hann er sagður henta best fyrir þann sem heitir Homer Hendel Bergen Heinzel. Aðeins eitt eintak til sölu.

Sett af lítið notuðum gervigómum til sölu.  Aðeins 2 tennur vantar

Rúmdýna í fullri stærð.  20 ára ábyrgð.  Eins og ný.  Örlar á hlandlykt.

Kalkúnn til sölu. Að hluta til snæddur.  Aðeins 8 daga gamall.  Báðir leggir ósnertir.

Í skólanum...

Nú sit ég sveitt en jafnframt einbeitt og sem próf, legg fyrir próf og fer yfir próf...allt snýst um próf og skóla þessa dagana. Valkvíði, góðvinur minn, er enn á ný kominn í heimsókn. Ég þarf sumsé að velja á milli þriggja námskeiða í Mastersnáminu í HÍ til að taka í fjarnámi núna...

 

Íslenska sem annað tungumál

Nám og þroski barna, unglinga og fullorðinna

Ritlist og bókmenntir

 

Hmmm...hvað hljómar nú best af þessu? Hvað ætli gagnist mér best í lífi og starfi?...erfitt val, ó já.

Blessuð jólin

Þá er komið að kveðjustund. Fallega jólatréð á leið út á götu, skrautið ofan í kassa og aðventuljósin þurfa að bíða í ellefu mánuði eftir því að sjá dagsins ljós á ný. Þessu fylgir alltaf ákveðin sorg eða tregi, ég verð að viðurkenna það.

 

Hins vegar er ég ein af þeim sem ætla mér að leyfa hvítu ljósunum að loga aðeins lengur. Ég get ekki hugsað mér að slökkva í myrkasta skammdeginu. Mér finnst þetta gott átak. Jóladótið og aðventuljósið fer niður en hvítu seríurnar fá að lifa, aðeins lengur...og ég á nú nokkrar Sörur eftir til að maula í góðu tómi á kvöldin...við bjarmann af ljósunum  

Kveðja jólin á þrettánda

Ríkisstarfsmenn í Marðarhundi

Þar hefurðu það herra Skattstjóri Reykjavíkur, sem í ár ákvaðst að gefa starfsfólki þínu hina ,,alíslensku" Cintamaniúlpu í jólagjöf - og hverjir borga? Jú við, skattgreiðendur...húrra og gleðileg jól...

Harma umfjöllun um Cintamani

Hverju var mótmælt?

Kryddsíldinni? Áramótum? Sigmundi Erni? Tækjabúnaði Stöðvar tvö? Guðmundi og Snorra Steini?

Það er gott við getum glaðst saman á gamlársdag og stundað þroskuð og vel hugsuð mótmæli. Þetta er hreint og beint ofbeldi og að auki framin skemmdarverk á eigum annarra.

Þetta fólk (og ég veit að þetta er lítill hópur) má gjarnan fá að taka afleiðingum gjörða sinna. Þetta gekk of langt - skilar engu nema gremju og reiði.

En að öðru:

Gleðilegt ár - megi nýja árið verða fullt af nýjum tækifærum, styrkri samtöðu og gleði og friði í hjörtum...maður má alltaf vona...

Farið varlega. Áramótafaðmlag austan að landi.

Fólk slasað eftir mótmæli

Gleðilega hátíð ljóss og friðar

Megi nýja árið taka brosandi á móti okkur, fullt af nýjum tækifærum, gleði og friði.

 

Ljúffeng

Skatan í hádeginu var nokkuð ljúffeng, lyktin finnst mér verri... Pabbi sauð þetta eins og fínn maður í eldhúsinu heima hjá sér...og ilmurinn eftir því. Þetta er herramanns matur, í góðu hófi þó

Skatan hans pabba í pottinum:

Gleðilegan skötudag! 

Dagur kæstu skötunnar

Hulin höfuð

Ég hef velt því mikið fyrir mér síðustu daga hvers vegna nokkrir mótmælendur fara huldu höfði, með svarta og drungalega klúta fyrir andlitinu. Mér finnst þetta gera þá skuggalegri og þeir eru í raun líkari glæpamönnum en glæpamennirnir sjálfir... Þeir ættu heldur að taka mótmælanda Íslands til fyrirmyndar.

Ég læt vera að tjá mig mikið um bolinn sem drengurinn, einn mótmælandanna, var í þegar hann heimsótti forsetann - boðskapurinn var ekki beint þroskaður...þó málefnið sé það vissulega.

Hengilásar og forsetakaffi

Gleðileg ,,kreppu" jól

Mig langar að nota tækifærið og þakka skartgripaverslun í Reykjavík fyrir þennan glæsilega jólabækling sem ég fékk sendan, líkt og flestir landsmenn, í pósti nýlega. Ég hafði einmitt ætlað mér að gefa mínum heittelskaða Rolex úr fyrir 875.391 króna. Mamma fær svo gullhálsmenið sem kostar 97.320. Ég ætlaði mér klárlega að versla þarna fyrir jólin - því það er ekki hugurinn sem gildir heldur verðið...

Í þessum bæklingi var engin vara sem hinn ,,venjulegi" borgari myndi kaupa - sú ódýrasta í kringum 15 þúsund krónurnar - sú langódýrasta. Hlægilegt var það eða sorglegt, veit ekki hvort.